Abair gur in ollmhargadh atá tú agus gur mhaith leat uachtar aghaidhe a roghnú, nó seampú a fháil do do leanbh as measc an iliomad táirgí. Conas is féidir leat fios a bheith agat cé na cinn is sláintiúla? Nó cé na cinn atá inbhuanaithe ó thaobh an chomhshaoil de? Conas a bheidh a fhios agat má tá substaintí contúirteacha in aon cheann acu?
Is aip é GoodGuide a ceapadh sna Stáit Aontaithe chun freagra a thabhairt ar na ceisteanna sin san fhíor-am.
Déanann GoodGuide táirgí a rangú trí úsáid a bhaint as eolas faoi na comhábhair atá iontu agus as rialacháin maidir le ceimiceáin. A bhuí leis an aip bíonn teacht ag tomhaltóirí ar eolas faoin táirge láithreach, eolas atá éasca le tuiscint.
Chun a fháil amach an bhfuil comhábhair ina bhfuil guaiseacha sláinte aitheanta sa táirge, is féidir le tomhaltóirí sna Stáit Aontaithe táirgí nó comhábhair áirithe a chuardach ar an suíomh gréasáin, nó barrachód an táirge a scanadh leis an aip mhóibíleach.
Ó tharla gur le haghaidh táirgí a dhíoltar sna Stáit Aontaithe a forbraíodh an aip, ní bhaineann an aip scanta barrachód leis an Eoraip. Ach cé gurb éagsúil in amanna foirmeacha na dtáirgí i SAM agus san Eoraip, tá teacht go forleathan ar fud an domhain ar bhrandaí móra, agus tá eolas an-chabhrach le baint ag tomhaltóirí san Eoraip as GoodGuide fós. Níl le déanamh ach táirgí a chuardach de réir ainm agus branda.
Rud is tábhachtaí fós, déanann GoodGuide tagairt do rialacha an Aontais maidir le cosmaidí agus táirgí cúraim phearsanta - arb iad na rialacha is doichte ar domhan iad i dtaca leis an gcosaint sláinte de.
Is i mBéarla amháin atá an aip seo.