Gach lá, foilsítear eolas nua ar líne, ó phostálacha blag go tionscadail taighde a fhaigheann maoiniú ón Aontas. Ach is meán gearrshaolach é an t-idirlíon.
Mar shampla, faoi 2015 ní raibh ach 7% de shuíomhanna gréasáin na dtionscadal a bhí bainteach leis an gceathrú creatchlár (FP4, 1994-1998) fós beo ar líne.
Ar shuíomhanna gréasáin taighde agus forbartha, is féidir teacht ar eolas nach mbíonn le fáil in aon áit eile, mar shampla
- bogearraí a úsáidtear i dturgnaimh
- tacair sonraí tástála
- doiciméid nach mbíonn teacht orthu i réimsí foilsitheoireachta acadúla ná tráchtála
- nuacht
- ábhar atá le scaipeadh.
Nuair a chuirtear suíomhanna gréasáin den sórt sin as feidhm, laghdaítear stór eolais an duine.
Conas is féidir linn sin a sheachaint? Is é cartlannú gréasáin an freagra.
Cuireann Arquivo.pt, atá á reáchtáil ag Fondúireacht na Portaingéile um Eolaíocht agus Teicneolaíocht, eolas acadúil agus eolaíoch ar fáil ar líne, rud a fhágann go bhfuiltear in ann tionscadail taighde agus forbartha a rinneadh cheana a bhrabhsáil go héasca.
Déanann sé suíomhanna gréasáin tionscadal taighde agus forbartha a aithint go huathoibríoch agus bailíonn sé an t-ábhar atá orthu. Tá 52 mhilliún comhad ó thionscadail taighde agus forbartha, a maoiníodh ó bhí FP4 ann, sábháilte ag Arquivo.pt cheana féin. Bailíodh na comhaid ó nach mór 54,000 suíomh gréasáin, agus tá an líon sin ag méadú i gcónaí.
Tá na tacair sonraí le haghaidh FP4, FP5, FP6 agus FP7 anois ar fáil don phobal, ionas gur féidir le heagraíochtaí eile ar mian leo an oidhreacht dhigiteach seo a chaomhnú iad a fheabhsú agus a athúsáid.