L-ikel huwa essenzjali għall-ħajja. U s-sikurezza tal-ikel hija kruċjali għal saħħitna.
Tiftakarha l-kriżi tal-mad cow disease tar-Renju Unit (enċefalopatija sponġiformi bovina - BSE) jew il-kwistjoni tad-diossina Belġjana? Fis-snin disgħin, serje ta’ kriżijiet tal-ikel kixfet nuqqasijiet serji fis-sistema tal-produzzjoni u d-distribuzzjoni tal-ikel, li dgħajfu l-fiduċja tal-konsumatur. B’riżultat ta’ dan, twaqqfet l-Awtorità Ewropea dwar is-Sigurtà fl-Ikel (EFSA) . Bilkemm għaddew 20 sena, u issa l-konsumaturi Ewropej huma fost l-iktar konsumaturi protetti u infurmati fid-dinja dwar ir-riskji fil-katina alimentari.
L-EFSA hija aġenzija tal-Unjoni Ewropea. Hija tipprovdi lil dawk li jfasslu l-politika b’parir xjentifiku imparzjali ta’ kalibru għoli dwar ir-riskji relatati mal-ikel, u b’hekk tgħin biex tipproteġi lill-konsumaturi Ewropej. Fl-istess waqt, din taħdem biex jingħalaq id-distakk bejn ix-xjenza u l-konsumatur billi tinforma lill-pubbliku minnufih dwar riskji eżistenti u emerġenti relatati mal-katina tal-ikel.
Fl-2016, l-EFSA organizzat premju għall-innovazzjoni - kompetizzjoni Hackathon għal żviluppaturi u disinjaturi mill-Ewropa kollha, biex joħolqu app li tagħti aċċess faċli għall-ħidma tal-EFSA.
L-app “EFSA to the people” hija r-rebbieħa ta’ din il-kompetizzjoni.
Din l-app, li tista’ taċċessaha mill-mowbajl, tippermettilek:
- tagħmel mistoqsijiet fis-sit web tal-EFSA u tikseb informazzjoni
- tiċċekkja l-aħħar xirja tal-ikel tiegħek billi tiskenja l-barcode tiegħu
- taqra l-aħħar aħbarijiet ippubblikati fis-sit web tal-EFSA.
L-app hi disponibbli bl-Ingliż.